Quran Urdu Translation

Surah Al Dahr

Translation by Fateh Muhammad Jalundhari

شروع اﷲ کے نام سے جو بڑا مہربان نہایت رحم والا (ہے)۔


بے شک انسان پر زمانے میں ایک ایسا وقت بھی آچکا ہے کہ وہ کوئی چیز قابل ذکر نہ تھا ‏‏

1

ہم نے انسان کو نطفہ مخلوط سے پیدا کیا

تاکہ اسے آزمائیں تو ہم نے اس کو سنتا دیکھتا بنایا

2

(اور) اسے راستہ بھی دکھایا (اب) خواہ وہ شکر گزار ہو خواہ نا شکرا ‏‏

3

ہم نے کافروں کیلئے زنجیریں اور طوق اور دہکتی آگ تیار کر رکھی ہے

4

جو نیکوکار ہیں وہ ایسا مشروب نوش جان کریں گے جس میں کافور کی آمیزش ہوگی ‏

5

یہ ایک چشمہ ہے جس میں سے خدا کے بندے پئیں گے

اور اس میں سے (چھوٹی چھوٹی) نہریں نکال لیں گے ‏‏

6

لوگ نذریں پوری کرتے ہیں اور اس دن سے جس کی سختی پھیل رہی ہوگی خوف رکھتے ہیں

7

اور باوجود یہ کہ ان کو خود طعام کی خواہش (اور حاجت) ہے فقیروں اور یتیموں اور قیدیوں کو کھلاتے ہیں ‏‏

8

(اور کہتے ہیں کہ) ہم تم کو خالص خدا کے لئے کھلاتے ہیں

نہ تم سے عوض کے خواستگار ہیں نہ شکر گزاری کے (طلبگار)

9

ہم کو اپنے پروردگار سے اس دن کا ڈر لگتا ہے جو (چہروں کو) کری المنظر اور (دلوں کو) سخت (مضطر کردینے والا ہے)

10

تو خدا انکو اس دن کی سختی سے بچا لے گا اور تازگی اور خوشدلی عنا یت فرمائے گا‏

11

اور انکے صبر کے بدلے ان کو بہشت (کے باغات) اور ریشم (کے ملبوسات) عطا کریگا ‏

12

ان میں وہ تختوں پر تکیے لگائے بیٹھے ہوں گے

وہاں نہ دھوپ (کی حدت) دیکھیں گے نہ سردی کی شدت ‏

13

ان سے (ثمر دار شاخیں اور) انکے سائے قریب ہونگے

اور میووں کے گچھے جھکے ہوئے لٹک رہے ہونگے ‏‏

14

(خدام) چاندی کے باسن لئے ہوئے ان کے اردگرد پھریں گے اور شیشے کے (نہایت شفاف) گلاس

15

اور شیشے بھی چاندی کے جو ٹھیک اندازے کے مطابق بنائے گئے ہیں ‏

16

اور وہاں ان کو ایسے مشروب پلائے جائیں گے جس میں سونٹھ کی آمیزش ہوگی ‏

17

یہ بہشت میں ایک چشمہ ہے جس کا نام سلسبیل ہے ‏

18

اور ان کے پاس لڑکے آتے جاتے ہوں گے جو ہمیشہ (ایک ہی حالت پر) آئیں گے

جب تم ان پر نگاہ ڈالو تو خیال کرو کہ بکھرے ہوے موتی ہیں ‏

19

اور بہشت میں (جہاں) آنکھ اٹھاؤ گے کثرت سے نعمت اور عظیم (الشان) سلطنت دیکھو گے ‏

20

ان (کے بدنوں) پر دیبا کے سبز اور اطلس کے کپڑے ہونگے

اور انہیں چاندی کے کنگن پہنائے جائیں گے

اور ان کا پروردگار انکو نہایت پاکیزہ شراب پلائے گا ‏

21

یہ تمہارا صلہ ہے اور تمہاری کوشش (خدا کے ہاں) مقبول ہوئی ‏

22

(اے محمد صلی اللہ علیہ وسلم) ہم نے تم پر قرآن آہستہ آہستہ نازل کیا ہے ‏‏

23

تو اپنے پروردگار کے حکم کے مطابق صبر کئے رہو

اور ان لوگوں میں سے کسی بدعمل اور ناشکرے کا کہا نہ مانو ‏‏

24

اور صبح و شام اپنے پروردگار کا نام لیتے رہو ‏‏

25

اور رات کو بڑی رات تک اسکے آگے سجدے کرو اور اس کی پاکی بیان کرتے رہو ‏ ‏‏

26

یہ لوگ دنیا کو دوست رکھتے ہیں اور (قیامت کے) بھاری دن کو پس پشت چھوڑ دیتے ہیں ‏‏

27

ہم نے ان کو پیدا کیا اور انکے مفاصل کو مضبوط بنایا

اور اگر ہم چاہیں تو ان کے بدلے انہی کی طرح اور لوگ لے آئیں ‏

28

یہ تو نصحیت ہے

سو جو چاہے اپنے پروردگار کی طرف پہنچنے کا راستہ اختیار کرے ‏‏

29

اور تم کچھ بھی نہیں چاہ سکتے مگر جو خدا کو منظور ہو

بیشک خدا جاننے والا حکمت والا ہے ‏

30

جس کو چاہتا ہے اپنی رحمت میں داخل کر لیتا ہے

اور ظالموں کیلئے اس نے دکھ دینے والا عذاب تیار کر رکھا ہے ‏

***********

31


© Copy Rights:

Zahid Javed Rana, Abid Javed Rana,

Lahore, Pakistan

Visits wef Apr 2024 free web page counter