Surah Al Qalam

ن

قلم کی اور جو (اہل قلم) لکھتے ہیں اس کی قسم

‏ کہ (اے محمد صلی اللہ علیہ وسلم) تم اپنے پروردگار کے فضل سے دیوانے نہیں ہو ‏‏

اور تمہارے لئے بے انتہا اجر ہے ۔‏‏‏

اور تمہارے اخلاق بہت (عالی) ہیں ‏

سو عنقریب تم بھی دیکھ لو گے اور یہ (کافر) بھی دیکھ لیں گے۔

کہ تم میں سے کون دیوانہ ہے ‏

تمہارا پروردگار اس کو بھی خوب جانتا ہے جو اسکے راستے سے بھٹک گیا۔

اور ان کو بھی خوب جانتا ہے جو اسکے راستہ پر چل رہے ہیں ‏

تو تم جھٹلانے والوں کا کہا نہ ماننا۔ ‏

یہ لوگ چاہتے ہیں کہ تم نرمی اختیار کرو تو یہ بھی نرم ہو جائیں ‏

اور کسی ایسے شخص کے کہے میں نہ آجانا جو بہت قسمیں کھانے والا ذلیل اوقات ہے ۔‏

طعن آمیز اشارتیں کر نے والا چغلیاں لئے پھرنے والا ‏

مال میں بخل کرنے والا حد سے بڑھا ہوا بدکار ‏

سخت خو اور اسکے علاوہ بد ذات ہے

اس سبب سے کہ مال اور بیٹے رکھتا ہے۔

جب اس کو ہماری آیتیں پڑھ کر سنائی جاتی ہیں تو کہتا ہے یہ اگلے لوگوں کے افسانے ہیں ‏

ہم عنقریب اس کی ناک پر داغ لگائیں گے ‏

ہم نے ان لوگوں کی اسطرح آزمائش کی جس طرح ہم نے باغ والوں کی آزمائش کی تھی

جب انہوں نے قسمیں کھا کھا کر کہا کہ صبح ہوتے ہوتے ہم اس کا میوہ توڑ لیں گے ‏

اور انشاء اللہ نہ کہا ‏

سو وہ ابھی سو ہی رہے تھے کہ تمہارے پروردگار کی طرف سے (راتوں رات) اس پر ایک آفت پھر گئی ‏

تو وہ ایسا ہو گیا جیسے کٹی ہوئی کھیتی ‏

جب صبح ہوئی تو وہ لوگ ایک دوسرے کو پکارنے لگے ‏

کہ اگر تم کو کاٹنا ہے تو اپنی کھیتی پر سویرے ہی جا پہنچو ‏

تو وہ چل پڑے اور آپس میں چپکے چپکے کہتے جاتے تھے ‏

کہ آج یہاں تمہارے پاس کوئی فقیر نہ آنے پائے ‏

اور کوشش کےساتھ سویرے ہی جا پہنچے (گویا کھیتی پر) قادر (ہیں) ‏‏

جب باغ کو (ویران) دیکھاتو کہنے لگے کہ ہم راستہ بھول گئے ہیں‏

نہیں بلکہ ہم (برگشتہ) بےنصیب ہیں ‏

ایک جو ان میں فرزانہ تھا بولا کہ میں نے تم سے نہیں کہا تھا کہ تم تسبیح کیوں نہیں کرتے؟ ‏

(تب) وہ کہنے لگے کہ ہمارا پروردگار پاک ہے بیشک ہم ہی قصوروار تھے ‏

پھر لگے ایک دوسرے کو رو در رو ملامت کرنے ‏‏

کہنے لگے ہائے شامت ہم ہی حد سے بڑھ گئے تھے ‏

امید ہے کہ ہمارا پروردگار اس کے بدلے میں ہمیں اس سے بہتر باغ عنایت کرے

ہم اپنے پروردگار کی طرف رجوع لاتے ہیں ‏

(دیکھو) عذاب یوں ہوتا ہے

اور آخرت کا عذاب اس سے کہیں بڑھ کر ہے۔کاش یہ لوگ جانتے ہوتے۔ ‏

پرہیزگاروں کے لیے ان کے پروردگار کے ہاں نعمت کے باغ ہیں ‏

کیا ہم فرمانبرداروں کو نافرمانوں کی طرح (نعمتوں سے محروم) کر دیں گے؟ ‏

تمہیں کیا ہو گیا ہے؟

کیسی تجویزیں کرتے ہو؟ ‏

کیا تمہارے پاس کوئی کتاب ہے جس میں (یہ) پڑھتے ہو۔ ‏‏

کہ جو چیز تم پسند کرو گے وہ تم کو ضرور ملے گی؟ ‏‏

یا تم نے ہم سے قسمیں لے رکھی ہیں جو قیامت کے دن تک چلی جائیں گی کہ جس چیز کا تم حکم کرو گے وہ تمہارے لئے حاضر ہو گی ‏

ان سے پوچھو کہ ان میں سے اس کا کون ذمہ لیتا ہے ‏‏

کیا اس قول میں ان کے اور بھی شریک ہیں؟

اگر یہ سچے ہیں تو اپنے شریکوں کو سامنے لائیں ‏‏

جس دن پنڈلی سے کپڑا اٹھا دیا جائے گا اور کفار سجدے کے لئے ہلائے جا ئیں گے تو سجدہ نہ کر سکیں گے ‏

ان کی آنکھیں جھکی ہوئی ہوں گی اور ان پر ذلت چھا رہی ہوگی۔

حالانکہ (اس وقت) سجدے کے لئے بلائے جاتے تھے جب کہ وہ صحیح سالم تھے ‏

تو مجھ کو اس کلام کے جھٹلانے والوں کو سمجھ لینے دو

ہم ان کو آہستہ آہستہ ایسے طریق سے پکڑیں گے کہ ان کو خبر بھی نہ ہوگی

اور میں ان کو مہلت دیے جاتا ہوں

میری تدبیر قوی ہے ‏

کیا تم ان سے کچھ اجر مانگتے ہو کہ ان پر تاوان کا بوجھ پڑ رہا ہے؟ ‏

یا ان کے پاس غیب کی خبر ہے کہ (اس سے) لپٹے جاتے ہیں؟ ‏

تو اپنے پروردگار کے حکم کے انتظار میں صبر کئے رہو

اور مچھلی (کا لقمہ ہونے) والے (یونس) کی طرح نہ ہونا کہ انہوں نے خدا کو پکارا اور وہ غم و غصے میں بھرے ہوئے تھے ‏

اگر تمہارے پروردگار کی مہربانی ان کی آوری نہ کرتی تووہ چٹیل میدان میں ڈال دیے جاتے اور انکا حال ابتر ہو جاتا ‏

پھر پروردگار نے ان کو برگزیدہ کر کے نیکوکاروں میں کر دیا

اور کافر جب (یہ) نصیحت (کی کتاب) سنتے ہیں تو یوں لگتے ہیں کہ تم کو اپنی نگاہوں سے پھسلا دیں گے

اور کہتے ہیں کہ یہ تو دیوانہ ہے ‏

اور (لوگو) یہ (قرآن) اہل عالم کے لئے نصیحت ہے ‏

***********

Visits wef Apr 2024