Quran Urdu Translation

Surah Al Abasa

Translation by Fateh Muhammad Jalundhari

شروع اﷲ کے نام سے جو بڑا مہربان نہایت رحم والا (ہے)۔

(محمد مصطفے صلی اللہ علیہ وسلم) ترش رو ہوئے اور منہ پھیر بیٹھے	1
کہ انکے پاس ایک نابینا آیا ‏	2
اور تم کو کیا خبر شاید وہ پاکیزگی حاصل کرتا ‏	3
یا سوچتا تو سمجھنا اسے فائدہ دیتا	4
جو پروا نہیں کرتا ‏	5
اس کی طرف تو تم توجہ کرتے ہو ‏‏	6
حالانکہ اگر وہ نہ سنورے تو تم پر کچھ الزام نہیں ‏	7
اور جو تمہارے پاس دوڑتا ہوا آیا ‏‏	8
اور (خدا سے) ڈرتا ہے ‏	9
اس سے تم بےرخی کرتے ہو ‏‏	10
دیکھو یہ (قرآن) نصیحت ہے ‏‏	11
پس جو چاہے اسے یاد رکھے ‏‏	12
قابل ادب ورقوں میں (لکھا ہو) ‏‏	13
جو بلند مقام پر رکھے ہوئے (اور) پاک ہیں ‏	14
(ایسے) لکھنے والے کے ہاتھوں میں ‏	15
جو سردار اور نیکوکار ہیں ‏‏	16
انسان ہلاک ہو جائے کیسا ناشکرا ہے ‏	17
اسے (خدا نے) کس چیز سے بنایا؟ ‏	18
نطفے سے بنایا پھر اس کا اندازہ مقرر کیا ‏	19
پھر اس کے لئے راستہ آسان کر دیا ‏‏	20
پھر اس کو موت دی پھر قبر میں دفن کرایا ‏	21
پھر جب چاہے گا اسے کھڑا کرے گا ‏‏	22
کچھ شک نہیں کہ خدا نے اسے جو حکم دیا اس نے اس پر عمل نہیں کیا ‏	23
تو انسان کو چاہیے کہ اپنے کھانے کی طرف نظر کرے ‏‏	24
بیشک ہم ہی نے پانی برسایا ‏‏	25
پھر ہم ہی نے زمین کو چیرا پھاڑا	26
پھر ہم ہی نے اس میں اناج اگایا ‏‏	27
اور انگور اور ترکاری ‏‏	28
اور زیتون اور کھجوریں ‏	29
اور گھنے باغ ‏	30
اور میوے اور چارا ‏	31
(یہ سب کچھ) تمہارے اور تمہارے چارپایوں کے لیے بنایا ‏‏	32
تو جب (قیامت کا) غل مچے گا ‏	33
اس دن بھائی اپنے بھائی سے دور بھاگے گا ‏‏	34
اور اپنی ماں اور اپنے باپ سے ‏‏	35
اور اپنی بیوی اور اپنے بیٹوں سے ‏‏	36
ہر شخص اس روز ایک فکر میں ہوگا جو اسے (مصروفیت کے لئے) بس کریگا	37
اور کتنے منہ اس روز چمک رہے ہوں گے ‏	38
خنداں وشاداں (یہ مومنان نیکوکار ہیں) ‏	39
اور کتنے منہ ہوں گے جن پر گردپڑ رہی ہوگی ‏	40
(اور) سیاہی چڑھ رہی ہوگی ‏	41
یہ کفار بدکردار ہیں ***********	42

© Copy Rights:

Zahid Javed Rana, Abid Javed Rana,

Lahore, Pakistan

Visits wef Apr 2024